Amerika, u. d. B.

& 432 & 13:00 - 13:18

Heide war ich widdorma diensddeschnisch in Benich unnorweeschns un weil ich hior nach dor Orbeed immor reichlich Zeid eiblan (jaaaaaa, zum Gäschn 😉), gelang der Einschdiesch bereids gurz vor eensn in Ameriga am Bahnhof, in die scheensde Freizeidgeschdalldung, die ich mir dengn kann 😁 Gebland war heide ne Wandrung von Ameriga nach Rochsbuirch an dor Mulde lang un off dor annren Seide widdor zerigge. Ich war hior zwar schon boorma unnorweeschns, sowohl ber Radl, als och ber Bedes, abor gäschdeschnisch eeschndlich noch gor ne. Das wolld ich heide ma n bissl nachholn 😁

Un da mor am Bahnhof so scheen borgn kann, begann ich hior meine Duur. Der erschde Muldi wolld mich zwar in die annre Richdung lodsn, doch ich blieb schdurr un nahm mir eefach diesn hior als Nägsdes vor.

[u]Schboilorbild 1:[/u] iesie Going, denn ich sah es noch vom Schdordbungd des annren Muldis aus.

[u]Schboilorbild 2:[/u] ab dem erschdn Bildschn hield ich die oochn abor ganz weid offn. Ich grischde dadurch zwar kaum was bewussd von der Geeschnd mid, abor die hadde ich schah schon bewandord (als Muggl), dafier fand ich den Ei- odor vielmehr Abschdiesch soford 😁

[u]Schboilorbild 3:[/u] kammor schah gor ne iborsehn.

[u]Schboilorbild 4:[/u] Is zwar och nich zu iborsehn, obwohl ganz scheen zugewachsn, abor hior holde mich dann doch das "OOOOOOOOOR" ibor die scheene Nadur un den herrlichn Bligg ei. Da bleibd mor doch gerne ma schdehn un saugd Muddor Nadur förmlich off. Un wenn mor ma bedengd, daß mor hior eeschndlich doch nie langkomm würde, wäre da nich ne Dose... WAS EEM DA ENDGEHN WÜRDE 😮 Denn der Weesch sidd och ne so aus, als würde er von mehr als nur Gäschorn benudzd wern. Abor so scheen... 😌

[u]Sdäidsch 1:[/u] Sa, Goordinadn orreichd, un nu? Erschdma Lisdig genau schdudiorn un iborleeschn, was dor zieschnmelgor hior meen könnde. Oh 😌 Das dordn? Hm, ob das schlau is, da orleene reizugrischn? Was wenn ich schdeggn bleib? Hior heerd mich doch och keenor um Hilfe blägn Un Bescheid gesaachd hab ich och keem? Ach komm, ich hab doch ne umsonsd die ganze Beleuchdungsdechnig umgebammld 😉 Ich gugg ma ...

[u]Sdäidsch 2:[/u] Aaaaah, Riggn widdor grade driggn [xx(] War doch gor ne so schlimm 😁 Da had mor schon von Schlimmren geheerd 😉 So, un nu? Lings, Raachds, Oom, Undn... Hm, was könnde dor Zieschnmelgor mid Margierung meen? Das hior edwa? Hm, is schah nüschd annres da? Werdsch wo das hior ma als Margierung annehm achslzugg Hädde mor villei noch mid "GC" verdeudlichn könn 😉 Sa, nu noch n bißl Raachnen, da hießes die graun Zelln ma zamnemm, denn die Dunglheed, obwohl mid Suchscheinwerfor ausgeschdrahl, machd een so orleene doch n bißl wuschich, besonnorsch, wenn mor ne weeß, was noch alles im Dungl gräuchd un fleuchd 😮 Abor ich hadde dann nenn Werd, der fier mich blausiebl aussah. Ich züggde das Maßband!

[u]Sdäidsch 3:[/u] Aaaaaaaah, wadd dad? 😮😮😮 Ooooooooom, ganz ruhsch, is nur ne Regwisidde [xx(] Eh, un das bei meim schwachn Herzn 🤕 Der Schregg saß in alln Gliedorn un ich mussde mich immorwiddor zu dem Schdrolsch umdreh un guggn, daßor mich ne doch anfladdord. Lengde zwar die Suche n bißl ab, abor ich wurde fündich. Sehr gudd gedarnd un mid Funzl sischor broblemadisch, abor sowas kann mir schah ne bassiorn 😉 Hm, wie nu weidor? Ach ja, achd Schdufn 😁 Off meim weidren Weesch iborleeschde ich, ob diese Öffnungshilfe iborhaubd noch fungdschiorniorn wird, so angegriffn, wie die ausschaud...???