#3194# 15:23

Heide orgab sich enn schbondanes Frei un da es bei Fonzi ähnlich aussah, endschlossn mir uns, n bissl Friehlingssonne zu orhaschn un uns Muddor Nadur zuzuwendn um die Köbbe ma frei zu grischn
Dabei verschluuch es uns widdor in den Middweidaor Raum, da hior noch einiche Gäschs laachn, die ich noch hinnor Luzi her mussde un da se mich off solsche Dourn eh ne begleidn mag... Fonzi folschd da immor gerne meim Ruf

Zuerschd ging es ma widdor nach Ringedool. Nachdem der Muldi im Beemorgordn absowiord war, ging es noch noff offn Berch. Erschd haddn mir n bissl Brobleme middor Weeschfindung un dann middor Goordinadnfindung, abor ledzdlich kamndn mir doch noch da an, wo mir wolldn. Da die Bixx schah n bissl unnorhalb lieschd, hammor uns zu erschdemo die Ruineresde angeschaud. Enn sehr indressandor Ord, von dem aus der Ausbligg echd doll is Abor irschndwann haddn mir alles gesehn un mir bilgordn weidor zu Dose. Huihuihui, hior kam man ordndlich ins rudschn. war es doch schon so droggn unnor dem aldn Laub? Da blieb Fonzi liebor oom draadn un begudachdede meine Gleddororgie. Ogee, nunnor ging schah ma noch. Das Deesl suchn war dann schon bissl offwendschor, hadde es sich doch unnor sehr reichlich Laub verschdeggd Un nach dem Signum... wie nu widdor noff komm? Das Laub gab immor noch nach Irschndwie gelang es mir off Händn un Fissn widdor noff zu komm un die ledzdn Medor kam mir Fonzi dann doch ma helfnd endgeeschn

Besdn Dank, liebor Strauchdieb, fier's Leeschn un Pfleeschn der Bixx un unbedingd och fier's Herfiehrn un Zeischn der Logäischn. Enn Ord, den man ohne nor Dose wo gaum zu Gesichd grischd Liem Gruß ausm fern Rußkams!