De Ewwerschter Gaasehenker

De Ewwerschter Gaaßehenker

En Bauer is mol vor etliche Johrn
mit seune Gaaß aus Ewwerscht gelaafe.
Zum Viehmoart wollt-er, unn hatt sich geschworn,
fer deier Geld deß Dier zu verkaafe.

E Prachtstick woar's, deß mußt mer schun
saache, 's woar dem Bauer seu allerbest Zucht.
E gut Milch gab deß Dier, die konnt mer vertraache,
unn de Kees dodevo hot mer aach gern versucht.

En Haufe Geld mißt deß Dierche eubringe,
deß seegt der Bauer so vor sich hie,
es woar noch net alt, konnt' noch ordentlich springe,
unn's verkaafe macht dann bestimmt kaa Mieh'.

Unnerwägs hot deß Dier alsfort am Saalche gezobbelt,
unn er hatt' schun seu Last mit dere zabbliche Gaaß.
Er mußt-se gut festhalte, sunst wär se'm fortgehobbelt,
unn bald hott-er geschwitzt, unn es wurd-em ganz haaß.

Aach woar es grad Summer unn rischdisch schee woarm,
unn de Wäg dorch de Wald woltt' nemme kaa End.
Die Sunn hot gebrennt uff seu weniche Hoarn,
unn vor Dorschd unn vor Hitz hot-er net-meh gekennt.

Doch midde im Wald, do lag ja zum Glick
am Bahndamm denäwe e Gastwertschaft.
Do konnt-er verschnaufe unn ruhe e Stick,
unn hett' fer de weitere Wäg aach Kraft.

Bevor er eneugeht, die Gaaß mit Bedacht,-
damit-se net dorchgeht, deß laafische Oos -,
hot mit'm Saal an de Bahnschrank festgemacht,
do konnt' se recht zobbele, deß kriegt' se net los.

Jetzt endlich konnt' unser Bauer was trinke,
e scheenes Maß Bier unn orndlich gekiehlt.
Eifrig dhut-er de Wertsfraa beiwinke,
unn bald hot-er sich richdisch wohlgefiehlt.

Doch blieb deß nadierlich net bloß bei aam Schobbe.
Bei lustische Leit, do hot-mer doch Spaß.
Er wollt', scheunt's, net fortgeh, wollt alsfort nor hocke,
unn längst vergesse schun woar die arm Gaaß.

Mit schwankendem Schritt, so dabbt'er enaus,
unn hot an die Gaaß aach wieder gedenkt.
Doch die Bahnschrank woar owwe, unn deß Dierche,
o Graus,
woar dorch dem Bauer seu Bleedheit schun uffgehenkt.

Do fiel-em vor Schrecke seu Herz in die Hose.
"Was mach ich dann jetzt beim Viehmoart ?", so
denkt-er,

doch die Gaaß hatt' ihr Läwenslicht längst
ausgeblose,
und seitdem haaßt mer uns "Gaaßehenker"!